У канцы тыдня пахаладае

Нягледзячы на тое, што студзень у Беларусі быў месяцам кантрастаў: адзначаліся як анамальна нізкія, так і анамальна высокія тэмпературы, у цэлым за месяц тэмпературны фон быў каля і на 1 градус вышэйшым за кліматычную норму. Ападкаў на большай частцы краіны выпала ад 1,5 да 2 месячных норм, месцамі сума ападкаў перавышала 2,5 студзеньскай нормы.

"Першы рабочы тыдзень лютага таксама будзе пераменлівым. На фоне марознага надвор'я ў сярэдзіне тыдня чакаецца кароткачасовае пацяпленне", - расказалі сіноптыкі.

У аўторак, 2 лютага, ноччу будзе без істотных ападкаў. Днём па паўночна-заходняй палавіне пройдзе невялікі снег. Ноччу і раніцай месцамі па рэспубліцы туман. На асобных участках дарог будзе галалёдзіца. Вецер паўднёвы, паўднёва-ўсходні ноччу слабы, днём умераны. Тэмпература паветра ноччу складзе 9-15 градусаў марозу, месцамі - 16-20 ніжэй за нуль, днём будзе мінус 3-9 градусаў, па паўднёвым захадзе - ад мінус 2 да плюс 1.

У сераду, 3 лютага, часам пройдзе снег, мокры снег, дождж. Месцамі туман, галалёд, на дарогах галалёдзіца. Вецер паўднёвы, днём з пераходам на заходні ўмераны. Ноччу чакаецца ад нуля па паўднёвым захадзе да мінус 10 па ўсходзе краіны, днём будзе ад 3 градусаў марозу да 4 цяпла, па паўднёвым захадзе - да плюс 5.

У чацвер, 4 лютага, часам чакаецца снег, мокры снег, па поўдні - з дажджом. Месцамі туман, галалёд, на дарогах галалёдзіца. Вецер пераменных напрамкаў умераны, днём парывісты. Тэмпература паветра на працягу сутак пераважна па паўднёвай палавіне краіны складзе ад мінус 4 да плюс 3, у паўночных раёнах - 5-9 градусаў марозу, ноччу па Віцебскай вобласці пры праясненнях да мінус 12.

У пятніцу, 5 лютага, месцамі, у асноўным па паўднёвым усходзе, чакаюцца кароткачасовы снег, слабая мяцеліца. На асобных участках дарог галалёдзіца. Ноччу будзе 10-15 градусаў марозу, пры праясненнях - да мінус 18, днём прагназуецца 6-13 ніжэй за нуль. Па поўдні ноччу будзе 7-9 градусаў марозу, днём - мінус 4-5.

Паводле папярэдняга прагнозу, у выхадныя чакаецца ўзмацненне маразоў.